Independent Forest Monitoring




პარტიები გვპირდებიან

ადგილობრივი თვითმმართველობის არჩევნები 2010

ინტერვიუ პოლიტიკური გაერთიანება ,,სახალხო დემოკრატები’’-ს ლიდერთან, მერობის კანდიდატთან ნიკა ივანიშვილთან და ამავე პარტიის კონსულტანტთან ვაჟა ბერიძესთან

29 აპრილი, 2010 წ.


ბატონო ნიკა, როგორ ფიქრობთ, რა არის ყველაზე მწვავე გარემოსდაცვითი პრობლემა, რომელიც თბილისის მოსახლეობას განსაკუთრებით აწუხებს?

ნიკა ივანიშვილი: მოგახსენებთ - ჩვენ ახალბედები ვართ და ყველაფრის კეთება ერთად მოგვიხდა: პროგრამის დაწერა, პარტიის ჩამოყალიბება, არჩევნებში მონაწილეობა... ჩვენი პროგრამა ახლა იწერება და მასში გათვალისწინებული იქნება გარემოს დაცვის საკითხები; ჩვენ ყოველთვის ვეხმიანებით გარემოს დაცვის თემას.

მოსახლეობა ვერ ხვდება, თბილისის მთავარი გარემოსდაცვითი პრობლემა მშენებლობის ბუმი და მშენებლობით გამოწვეული მტვერია; თან, მინდა დავამატო, საშენი მასალა უხარისხოა. პრობლემაა ამ მტვრის მოძრაობა თბილისში და ამ მტვრის სუნთქვა ჩვენი თანამოქალაქეებისათვის. არანაირი სტანდარტი, ამ მხრივ, დაცული არ არის. ეკოლოგიურად ჭუჭყიანი პროდუქტისაგან ზიანდება გარემო. საშენი მასალები არ არის სუფთა და ამიტომ პრობლემას ქმნის. საზღვარგარეთ ნამყოფი ადამიანი ნახავდა, რომ ყველა მშენებლობა შეფუთულია. ეს იმიტომ კი არა, რომ სიურპრიზი გაუკეთონ მოქალაქეებს, თუ როგორი შენობა ააშენეს. ეს, პირველ რიგში, ეკოლოგიური პრობლემაა და ადამიანის დაცვა იმ მავნე ნივთიერებებისაგან, რომლებიც ამ დროს გამოიყოფა. ეს უდიდესი პრობლემაა.

მეორე პრობლემა, შესაძლოა, იყოს სასმელი წყლის პრობლემა. ჩემმა მეგობარმა გამომიგზავნა თემა, რომელიც სასმელი წყლის ბაქტერიებით დაბინძურებას ეხებოდა. ამ სფეროში არსებობს ახალი ტექნოლოგიები, სპეციალური მანქანა-დანადგარები, რომლებიც უხილავ ბაქტერიებს ანადგურებს. ჩვენი მერიაში მოსვლის შემდეგ, ჩვენ ვფიქრობთ, დავნერგოთ ეს ტექნოლოგიები; რეალურად მოხსნის პრობლემას. დღეს ქლორის დონეზეა დაყვანილი წყლის დამუშავება. ვფიქრობ, რომ ეს არ არის სწორი. ქლორით დამუშავება მოძველებული ტექნოლოგიაა.

საერთოდ, ჩემთვის პრიორიტეტულია მწვანე თემა. არ შეიძლება ჯერ გაჩეხო ტყე და შემდეგ დაპირდე ხალხს, რომ იქ ნიუ-იორკის ცენტრალური პარკის მსგავს რამეს გააშენებ. არ ვიცი, რატომ უნდა მოჭრა ამდენი ხნის გაზრდილი ხე?!

პრობლემურია ასევე რკინიგზის გადატანა თბილისის ზღვაზე. ღმერთმა დაგვიფაროს, ერთი ნავთობით სავსე ცისტერნა რომ დაიღვაროს თბილისის ზღვის მიმდებარე ტერიტორიაზე, ეს კატასტროფის მომტანი იქნება თბილისისთვის.

თუ თქვენ არ აგირჩიეს მერად, ეს თემა კვლავ აქტუალური იქნება თქვენთვის?

ნიკა ივანიშვილი: რა თქმა უნდა. მე მინდა ერთ რამეს გაუსვა ხაზი - სახალხო დემოკრატიული პარტია არ შექმნილა 30 მაისის არჩევნებისათვის. ჩვენ გადავწყვიტეთ პოლიტიკაში მოვიდეთ, პოლიტიკაში დავრჩეთ და ვიმოღვაწეოთ. ამდენად, ეს თემები, რომლებიც ეხლა მნიშვნელოვანია, კვლავ მნიშვნელოვნად დარჩება. არ ვიცი, ჩვენი ალიანსი “მწვანეებთან” გაგრძელდება, თუ არა - ამას მნიშვნელობა არ აქვს; ეს თემა ვინმეს პრივატიზებული ხომ არ აქვს? ჩვენ ვიბრძვით იმისათვის, რომ მოგვარდეს პრობლემა. ჩვენ რაც გვაწუხებს, იმ დანაპირებს ვაძლევთ ჩვენს თანამოქალაქეებს.

სააკაშვილმა 80 წლის კაცი ციხეში გამოკეტა, წყნეთში ორი ხის მოჭრის გამო. ძალიან გთხოვთ, ადით და ნახეთ - მთელ სიგრძეზე გაჩეხილია ტყე და სახლების მშენებლობა მიმდინარეობს; ვითომც არაფერი!.. ჩვენი ხელისუფლება ტყუილებით ასაზრდოებს საზოგადოებას!

რკინიგზის თემას დაუბრუნდეთ – როგორ ფიქრობთ, არსებობს რკინიგზის გარეუბნებში გადატანის საჭიროება?

ნიკა ივანიშვილი: ქალაქის გაფართოებისათვის რკინიგზის გადატანა შესაძლებელია, მაგრამ არამც და არამც თბილისის ზღვაზე.

თქვენ ბრძანებთ, რომ შესაძლოა შეიცვალოს მარშრუტი, მაგრამ ზოგადად, რკინიგზის გადატანის იდეის წინააღმდეგი არ ხართ?

ნიკა ივანიშვილი: როგორ შეიძლება იდეის წინააღმდეგი ვიყო?! თბილისის ცენტრში გამოთავისუფლდება უბნები, სადაც უამრავი ახალი რამ შეიძლება შეიქმნას, რაც თავის მხრივ, სამუშაო ადგილებს შექმნის. ახალ სამუშაო ადგილებს შექმნის რკინიგზის გადატანის პროცესიც კი; მაგრამ თბილისის ზღვასთან ახლოს რკინიგზის გადატანა, კატეგორიულად მიუღებელია. წარმოიდგინეთ - გადააქვთ რკინიგზა და დაკონსერვებულ მეტროს არ ამთავრებენ, რომელიც ეკონომიურად მისაღებია ჩვენთვის. მეტრო ჩვენი თანამოქალაქეებისთვის ყველაზე იაფი გადაადგილების საშუალებაა. ეს ყველაფერი პოპულიზმის დონემდეა დაყვანილი. ეს პრობლემები ჩვენს საარჩევნო პროგრამაშიც იწერება და თუ თვალს მიადევნებთ ჩვენს საქმიანობას, დარწმუნდებით, რომ ამ პრობლემებს ყველგან ვაჟღერებთ.

დღეს ვიყავით იპოდრომზე - კიდევ კარგი, იქ მიმდინარეობს მწვანე ნარგავების დარგვა - ვნახეთ ბევრი ახალი ნარგავი, სხვადასხვა ხეების ჯიშები. ნერგებია ჩაყრილი და ალბათ, ბაღის გაშენებას ფიქრობენ. ერთი ისტორია მახსენდება - როდესაც რუსთავში მეტალურგიული ქარხანა შენდებოდა, დააპირეს ქარხნის მშენებლობა მცხეთა-თბილისის მონაკვეთზე. სტალინმა, რომელიც არც კი იყო ნამყოფი თბილისში, მანაც კი იცოდა, რომ ქალაქი ამ საშუალებით ნიავდებოდა და ქარხანა ქალაქის ბოლოში გადაიტანა; იმ ადამიანმაც კი იფიქრა თბილისის ეკოლოგიურ განვითარებაზე!

ბატონო ნიკა, თქვენ რამოდენიმე პრობლემა გამოყავით - რკინიგზა, რეკრეაციული ზონები, მშენებლობები... შესაძლებელია ყველა ამ საკითხის გაერთიანება ერთი ქუდის ქვეშ - ესაა ქალაქის სივრცითი დაგეგმვა. თუ თქვენ გახდით ქალაქის მერი, რას გეგმავთ სივრცითი დაგეგმვის გასაუმჯობესებლად?

ნიკა ივანიშვილი: პროფესიონალები იქნებით მოწვეულნი. საკითხს მიუდგებიან მხოლოდ ის ადამიანები, ვინც არინ კომპეტენტურები და პროფესიონალები.

დღევანდელ მერიაშიც ფიქრობენ, რომ ისინი პროფესიონალებით არიან გარშემორტყმულნი; ისინიც დარწმუნებულნი არიან მათ კომპტენტურობაში. შესაძლოა, თქვენც შემოიკრიბოთ კონკრეტული პროფესიონალები, რომლებიც თავიანთ მოსაზრებებს მოგაწოდებენ და თქვენც გადაწყვეტილებას მიიღებთ მათი რჩევის საფუძველზე...

ნიკა ივანიშვილი:
მე შემოვიკრებ ყველა იმ ადამიანს, რომელიც ამ პრობლემებით არის დაინტერესებული. თბილისის მერიაში შეიქმნება საბჭო, რომელიც ამ პრობლემებზე იმსჯელებს. იქ იქნება ღია მსჯელობა და საკითხები ხმათა უმრავლესობით გადაწყდება. თუ პროფესიონალების წრე შეჯერდება ერთ საკითხზე, მაშინ საზოგადოებაც ჩაერთვება. საზოგადოება დღეს არაფერში არ არის ჩართული, არც პოლიტიკაში. საზოგადოება მარტო აქციებისათვის სჭირდებათ. საზოგადოება არის სამიტინგე მასა; ზოგი, შესაძლოა, არჩევნებზეც არ მივიდეს... ყველა უნდა მივიდეს და ყველა უნდა ჩაერთოს ყველა პროცესში მათ შორის, დედაქალაქის და რეგიონების განვითარების პროცესში!Eმე თბილისს არ ვცდები, თორემ უამრავი პრობლემაა, მაგალითად, შავი ზღვის სანაპიროზე. ეს მივიწყებული თემებია. გარემოს დაცვის სამინისტრო ხეების დარგვას “აპიარებს”, ხეების დარგვა კი, სხვა ადამიანის ინიციატივაა და ყველამ მიიწერა... იმ ადამიანმა ეს ინიციატივა, როგორც სულიერების გაძლიერება, ისე შემოგვთავაზა. ამ თემის “გაპიარება” სრულიად მიუღებელია.

თბილისის მერმა ხელი მოაწერა კლიმატის ცვლილების ,,კოვენანტს’’ და მე ვფიქრობ, რომ ეს წინა საარჩევნოდ გააკეთა, ვინაიდან რაც დღეს ხდება, ყველაფერი თავიდან ბოლომდე ეწინააღმდეგება ამ დოკუმენტს: აყარეს ტრამვაის ხაზები, არ გადაწყვიტეს ტროლეიბუსების საკითხი, მთელი ევროპა ბიოლოგიურ საწვავის მოხმარებაზე გადადის,Aაქ კი, საწვავის შემოტანაზე კონტროლი - ნოლია.

წინასაარჩევნოდ, ერთი არამომგებიანი თემა უნდა წამოვწიო - ტექ-დათვალიერების გაუქმება იყო ჩვენი ქვეყნის ეკოლოგიისთვის ზიანის მომტანი. შემოდის მოძველებული მანქანები, ისხმება დაბალი ხარისხის ბენზინი და ამ გამონაბოლქვს ვსუნთქავთ ჩვენ და ჩვენი შვილები.

მერობის შემთხვევაში, რა მექანიზმების დანერგვას გეგმავთ ამ პრობლემის მოსაგვარებლად?

ნიკა ივანიშვილი: ბენზინის შემოტანაზე უნდა იყოს დიდი კონტროლი. უნდა ჩავასხათ ხარისხიანი საწვავი, რომ ჩვენ ეკოლოგიას არ შეუქმნათ პრობლემა.

მე და ვაჟა არ ვართ პროფესიონალები ამ კუთხით, მაგრამ ჩვენ ამ პრობლემებს ვგრძნობთ და ამას ვამბობთ. მე მინდოდა მწვანეებთან მოლაპარაკება; არც ვიცი რაში სჭირდებოდა მთავრობას მათი დაბლოკვა, ისინი არ მონაწილეობენ არჩევნებში. ჩვენ დავიწყეთ მათთან მოლაპარაკება, არა ჩუმად, არამედ ღიად. შევხვდით, ამ თემებზე ვისაუბრეთ და ისინი წამოვიდნენ ჩვენთან ბლოკის პრინციპზე. თუ ჩვენი თანამშრომლობა მყარი იქნება, ჩვენ, ალბათ, საპრეზიდენტო არჩევნებისთვისაც გავერთიანდებით.

ვაჟა ბერიძე: “სახალხო დემოკრატები” ჩვენი პარტიისთვის ლამაზი სახელის გამო არ დაგვირქმევია. ჩვენ ვართ დემოკრატიული და სახალხო პარტია. ჩვენ დავიწყეთ მოლაპარაკება ყველასთან, ჩვენ დავიწყეთ ყველასთან საუბარი. ჩვენი ამოცანაა, რომ ყველას ვესაუბროთ. ჩვენი პარტია იმ ადამიანების პარტიაა, რომლებიც არ ან ვერ მიდიან საზღვარგარეთ. ამიტომ ჩვენ გვინდა, აქ იყოს ისეთი გარემო, სადაც ჩვენ ვიცხოვრებთ კარგად. ჩვენ არ გვაინტერესებს, არც ნაციონალების მედროვეობა და არც ვინმეს პოპულიზმი. ჩვენ ვართ, კარგი ქალაქელების და კარგი პროვინციელების გაერთიანება. რითი უნდა დავიწყოთ? უნდა დავიწყოთ ბუნებრივი გარემოთი – ეს არის ის, რაც ჩვენ გვაქვს და რაც მოიზიდავს ინვესტორს.

არაბები და სომხები მოდიან და ყიდულობენ მიწებს... კი ბატონო, ყველა მოვიდეს, მაგრამ მოდით, ჩვენ მოვიწყოთ ჩვენი სახლი! ბენდუქიძე გვეუბნება - ერთი მილიონი ჩინელი და ერთი მილიონი ინდოელი ერთდროულად შემოვუშვათო. ჩვენ ეს არ გვინდა - მოდით, ჩვენ მოვიწყოთ ჩვენი სახლი. პირველ რიგში, უნდა დავრგოთ ნარგავები. სილამაზე, სისუფთავე, სუფთა ჰაერი... ჩვენ ბაღნარში ვცხოვრობთ და პირველ რიგში, ამ ბაღნარს უნდა მოუფრთხილდეთ.

ბიზნესთან დამოკიდებულების ჩვენი მთავარი პრინციპი იქნება ხელის არშეშლა. თუ ბიზნესს არ შეუშლი ხელს დრაკონული საგადასახადო რეკეტით და კლანებს არ ჩაუგდებ ხელში, დიდი ბიზნესი, როგორიცაა კვების პროდუქტების წარმოება, მობილური ტარიფები, ფარმაციის ბაზარი, თავად დაასაქმებს ყველას. საქართველო არ არის დიდი ქვეყანა, ოთხი მილიონი ადამიანი არ არის საკმარისი იმისათვის, რომ აქ ნორმალური ეკონომიკა განვითარდეს - ჩვენ დაგვჭირდება მუშა-ხელი. ჩვენი სლოგანი, ბიზნესთან მიმართებაში, არის ის, რომ ჩვენ ხელს არ შეუშლით ბიზნეს და გავათავისუფლებთ მას. ბოლო წლების სლოგანებია - ეკონომიკის ლიბერალიზაცია და ნაკლები მარწუხები ბიზნესს. ეს არის ბიზნესის გაადვილების ერთ-ერთი მეთოდი.

ბიზნესის განვითარებას, რა თქმა უნდა, ხელი უნდა შეეწყოს, მაგრამ ეს არ უნდა მოხდეს გარემოს ხარჯზე. როგორ წესი, ბიზნესის განვითარებას ეწირება გარემო...

ვაჟა ბერიძე: მაგალითს მოვიყვან - თურქეთთან ურთიერთობის შენარჩუნების ხარჯზე, ჩვენ დავთანხმდით ,,დერინერის’’ კაშხლის მშენებლობას. აჭარაში ელექტროენერგიის გაზრდის მიზნით, აჭარის წყალზე, დავთანხმდით ხუთი ჰეს-ის მშენებლობას. ეს არის ხუთი დამღუპველი პროექტი, რომელზეც საზოგადოება ხმას არ იღებს. ჩვენ, როდესაც გავცდებით თბილისს, ამ პრობლემებსაც დავაყენებთ; ჩვენ არ შემოვიფარგლებით თბილისით. ჩვენ არ ვართ ის ხალხი, რომელიც პოპულიზმზე დაყრდნობით აკეთებს არჩევანს. მაგალითად, ტექ-დათვალიერებაზე ფული კეთდებოდა, იყო კორუფცია. იმის გამო, რომ იქ არ გაკეთდეს ფული, გააუქმეს ტექ-დათვალიერება. იმისათვის, რომ მერიაში ვინმემ ფული არ აიღოს, არ უნდა მოიშალოს ლიცენზიების გამცემი სტრუქტურა.

ნიკა ივანიშვილი: ძველი სახლების თემაზე მინდა აღვნიშნო - ძველი სახლები უნდა დახარისხდეს და თუ სახლს აქვს არქიტექტურული ღირებულება, უნდა შეკეთდეს. არ უნდა იყოს ისე - ოღონდ ვინმემ რამე ააშენოს. სხვა შემთხვევაში, მივიღებთ შენობების ხროვას; იმ “თეატრალურ დეკორაციებს”, რომლებიც ძველ თბილისში მრავლადაა. ბუდაპეშტში ეს საკითხი ასე გადაწყვიტეს - ძველ უბნებში ფასადი უნდა შენარჩუნდეს, ხოლო შიგნით - რაც გინდა გააკეთე. ჩვენ მოვიწვევთ ექსპერტებს და მათთან ერთად გადავწყვეტთ ასეთ საკითხებს, მაგრამ აუცილებელია მესამე მხარეც - ხალხი; მსაჯული ყოველთვის ხალხია. თუ ხალხმა უფლება არ მოგცა, მაშინ არ უნდა გააკეთო. მე არც ის მომეწონა, როცა ხალხმა გამსახურდია და სააკაშვილი აირჩია, მაგრამ მაინც მზად ვარ, დავემორჩილო ხალხს. უნდა შეგეძლოს, პროფესიონალურად დაელაპარაკო ხალხს, აუხსნა პოზიცია და დაიყოლიო. უნდა არსებობდეს მესამე მხარე - ჩვენ ასე გვესმის.

ნაგავსაყრელების პრობლემა მთელს მსოფლიოში მოგვარდა, ჩვენთან კი სახელმწიფოს არა აქვს პოლიტიკური ნება, რომ ეს საკითხი გადაწყვიტოს. თანხა უნდა გამოიყოს, აშენდეს ქარხნები. რაც გადამუშავდება, უნდა გადამუშავდეს; რაც არ გადამუშავდება, არსებობს ტექნოლოგიები, რომლებსაც რაღაც სტადიამდე მიჰყავთ ნარჩენები. დაწვის მომხრე არ ვარ. პროფესიონალები არ ვართ და ზოგადად ვუყურებთ ამ საკითხს, ამიტომ ვფიქრობ, დაწვის დროს დაბინძურდება გარემო.

ვაჟა ბერიძე: რატომ არ ჩამოიყვანეს ვინმე ნაგვის გადამუშავებისთვის? იმიტომ, რომ დაიანგარიშეს ნაგვის მოცულობა და ბიზნესი არ აღმოჩნდა ფინანსურად მიმზიდველი. წილში თუ “ჩაუჯდებიან”, იმდენი მოგება არ დარჩება, რომ ინვესტორი დაინტერესდეს; ამიტომ დარჩა ეს თემა ასე. ეხლა საუბარია ახალ ნაგავსაყრელებზე, საუბარია ლილოში ახალი ნაგავსაყრელის მოწყობაზე. ჯერ გადაწყვიტეს ნორიოში მოწყობა, ატარეს აქეთ-იქით, მაგრამ ვერ შეარჩიეს ადგილი.

ბატონო ნიკა, როგორია თქვენი პოზიცია თბილისში მაგისტრალის მშენებლობასთან დაკავშირებით?

მინდა ვთქვა, რომ ეს არის ფულის გაკეთების წყარო. ეს ყველაფერი კარგი იქნებოდა გაკეთებულიყო მას შემდეგ, რაც პროექტი გახდებოდა ფართო მსჯელობის საგანი და შესაძლოა კარგი პროექტიც ყოფილიყო. ამ პროექტით, შესაძლოა, მოძრაობა განიტვირთოს ჭავჭავაძეზე, მაგრამ ღირდა, თუ არა ამისათვის ასტრონომიული თანხის გაღება?! არქიტექტორს, რომელსაც პროექტი ეკუთვნოდა, არაფერი არ ჰკითხეს.

ჩვენი მთავარი პრიორიტეტია საზოგადოების ჩართულობა. ჩვენ არ ვიღებთ ერთპიროვნულ გადაწყვეტილებებს; აუცილებელია განსხვავებული აზრის მოსმენაც. შესაძლოა, გიგი უგულავას ჩემზე მეტად უყვარს თავისი სამშობლო, მაგრამ მე მინდა, რომ მან ადამიანად ჩამაგდოს და არა მტრად. ისინი ვერ იტანენ ოპონენტებს; მას შემდეგ რაც ხელისუფლებაში მოვიდნენ, დებატები დასრულდა. ისინი ოპოზიციას ცინიკურად ელაპარაკებიან, ხალხი გაგდებულია პოლიტიკიდან. მე არ მინდა ისეთ ქვეყანაში ვიცხოვრო, სადაც ხალხს არ უსმენენ. არსებობს მშვენიერი ვერტიკალი - პოლიტიკური ხელმძღვანელობა, არასამთავრობო სექტორი და ხალხი. არასამთავრობო სექტორი უნდა გათავისუფლდეს პოლიტიკური ანგარიშვალდებულებისგან, ხელისუფლება - მართვადი მეგობარი ფონდებისგან. არ შეიძლება, ხალხი ხშირად შეცდეს.

ჩემი საქმიანობა შედეგს გამოიღებს მხოლოდ თანამშრომლობის შემთხვევაში. გპირდებით, რომ ვითანამშრომლებ არასამთავრობო სექტორთან, მესამე ძალა კი, საზოგადოება იქნება. ვიმეორებ - არავითარ გადაწყვეტილებას არ მივიღებ მარტო. მოწვეული იქნებიან პროფესიონალები, ხალხი და ასე გადაწყდება საკითხები.

წინა პლანზე უნდა წამოვწიოთ ადამიანი; თუ ადამიანის მტერი იქნები, გინდა ერთი ხე დარგე და გინდა ოცი. როდესაც ადამიანს აზრს ეკითხები - უყვარხარ, იგნორირების შემთხვევაში - მტრად გეკიდება. მინდა ვითანამშრომლო ყველასთან, მათ შორის, ამ ხელისუფლებასთან, რომელიც არ მიყვარს. ჩემი ქვეყნის ინტერესებიდან გამომდინარე, თუ პოლიტიკაში მოვედი, უნდა ვიყო მზად, რომ ყველასთან დავჯდე მოსალაპარაკებლად.
 

უკან
ინტერვიუები
მხარდაჭერილია საქართველოში ნიდერლანდების სამეფოს საელჩოს მიერ
Copyright © Green Alternative. All rights reserved