Independent Forest Monitoring




პარტიები გვპირდებიან

ადგილობრივი თვითმმართველობის არჩევნები 2010

ინტერვიუ პოლიტიკური პარტიის ,,ჩვენი საქართველო - თავისუფალი დემოკრატები’’ ეკონომიკური კომისიის თავმჯდომარესთან, დავით ონოფრიშვილთან

4 მაისი, 2010 წ.

ბატონო დავით, რა პრობლემებს ხედავთ, თქვენ და თქვენი მერობის კანდიდატი ირაკლი ალასანია გარემოს დაცვის კუთხით?

ირაკლი ალასანია და “ალიანსი” დიდ ყურადღებას აქცევს ეკოლოგიის გაუმჯობესების საკითხს. ჩვენ დღესაც ვმუშაობთ ამ საკითხებზე, გვყავს სერიოზული და გამოცდილი ექსპერტები ამ დარგში და მიგვაჩნია, ის მიდგომა რაც დღეს არის, არასწორია.

ატმოსფერული ჰაერის დაბინძურების თვალსაზრისით, ქალაქის დიდ ნაწილში კატასტროფული მდგომარეობაა. მაგალითად, გმირთა მოედანზე და დავით აღმაშენებლის გამზირზე, ასევე მთელ რიგ სხვა ადგილებში, დაბინძურება ევრო-სტანდარტების ნორმას და სხვა სტანდარტებს აჭარბებს. შექმნილი მდგომარეობა იქ მცხოვრებ მოსახლეობას, განსაკუთრებით ბავშვებს, სასიცოცხლო საშიშროებას უქმნის. ეს გამონაბოლქვი ხდება ერთ მეტრში, სადაც ბავშვები დადიან, მათზე ეს ყველაფერი ნეგატიურად აისახება. ცნობილია, რომ ბოლო დროს გაიზარდა მთელი რიგი დაავადებები და როგორც მეცნიერები ამბობენ, ყველაფერი ეს ურთიერთკავშირშია.

მნიშვნელოვანია ასევე, წყლის აუზის დაბინძურების პრობლემა; მთელ რიგ ადგილებში არის ხმაურის პრობლემა; საყოფაცხოვრებო ნარჩენების პრობლემა კვლავ აქტუალურია; გაუარესებულია, ზოგადად, მიკროკლიმატი. კლიმატი ქალაქში ნეგატიურად უფრო იცვლება ვიდრე პოზიტიურად. ეს ბოლო ათი წლის და შესაძლოა უფრო მეტი ხნის განმავლობაში ხდებოდა, მაგრამ ბოლო ხუთი წლის განმავლობაში განსაკუთრებით გაუარესდა. ახლანდელი ხელისუფლების და დღევანდელი მერის ხელში უფრო გაუარესდა მდგომარეობა, აქტიური ღონისძიებები რეალულად არ გატარებულა და აქამდე რაღაც აქტიური ჩარევა სახელმწიფოს მხრიდან და ქალაქის ხელისუფლების მხრიდან, ამ საკითხში პრაქტიკულად არ მომხდარა.

მაგალითად, ტყვიის შემცველობა ნიადაგში და გაფრქვევები ჰაერში ძალიან მაღალია და ამაზე რეალური, ადექვატური რეაგირება არ ხდება. უნდა აღვნიშნოთ, რომ თბილისის დაბინძურებაში დიდი როლი მიუძღვის ავტოტრანსპორტს. თბილისი და საქართველო ერთადერთი ქვეყანაა მსოფლიოში, სადაც ავტოტრანსპორტს არ უტარდება ყოველწლიურად ტექნიკური დათვალიერება. სააკაშვილის მერობის დროს, სწორედ მისი ინიციატივით, შემოწმება გაუქმდა. სამწუხაროა, რომ მოსახლეობა ადექვატურად ვერ აფასებს იმას, რომ ეს მათი ჯანმრთელობის საწინააღმდეგო ქმედება იყო. ვითომ კარგი ნაბიჯი გადადგა - “კორუფცია არისო”. შეიძლება იყო კიდეც, არ გამოვრიცხავ, მაგრამ კორუფციის შიშით ინსტიტუტები არ ინგრევა, პირიქით, ძლიერდება და შესაბამისად, სხვა ღონისძიებები ტარდება. ამ საბაბით გაუქმდა ანტიმონოპოლიური სამსახურიც და შემდეგ, ეკონომიკა დაგვენგრა თავზე. მონოპოლისტები ვითომ არ იყვნენ და ბოლო სამ თვეში აღმოჩნდა, რომ მთელ ქვეყანაში მონოპოლისტური ბაზარი ყოფილა.

რა კონკრეტული მექანიზმების გამოყენებას გეგმავთ სატრანსპორტო გამონაბოლქვის შესამცირებლად?

ჩვენ შემდეგი მიდგომა გვექნება - პირველ რიგში ვაპირებთ, შედგეს ქალაქ თბილისის ატმოსფერული ჰაერის ეკოლოგიური დაბინძურების რუკა. რუკა რაღაც სახით არსებობს, მაგრამ ინფორმაციული კველევები აღარ ხორციელდება; შესაძლოა, არ ფინანსდება. შედგება სახელმწიფო პროგრამა ,,თბილისს სუფთა ჰაერი’’ – ჩვენი ექპერტები უკვე აკეთებენ მონახაზს. გვინდა, რომ პროგრამა სწრაფად განხორციელდეს. სწორედ ამ პროგრამის ფარგლებში შედგენილი იქნება რუკა, დადგინდება დაბინძურების ადგილები და ფაქტორები და შესაბამისად, გადაწყვეტის გზებიც. ერთი ფაქტორით ვერ იმოქმედებ, ასეთ შემთხვევაში, კომპლექსური მიდგომაა საჭირო.

ჩვენ ასევე გვინდა, გავაკეთოთ იგივე წყლის დაბინძურებასთან დაკავშირებით – პროგრამა დასახელებით ,,თბილისელებს სუფთა წყალი”. მასზე ექსპერტები მუშაობენ. ჩვენ გვინდა, რომ ჩვენი ეკოლოგიის სტანდარტების გარკვეული მიახლოება განხორციელდეს ევროსტანდარტებთან. თუ ჩვენ პოლიტიკურად ვესწრაფით ევროგარეთიანების სტრუქტურებს, შესაბამისად, ეს ღონისძიებები უნდა იყოს მახლობელი. ერთი ნაბიჯით შესაძლოა ვერ მიუახლოვდე, მთელ რიგ სხვა პრობლემებს წარმოქმნის უცბად მიახლოება, მაგრამ რაღაც ეტაპები უნდა დაისახოს. უნდა არსებობდეს მოთხოვნები; ეს ეხება წარმოებებს, კვების პროდუქტებსაც, გამონაბოლქვსაც და ყველაფერს; შესაძლოა ასე მიუახლოვდეთ ევროსტანდარტებს.

რა ვადაში განხორციელდება ეს ორი პროგრამა?

ჩვენ ვფიქრობთ, რომ ეს სწრაფად გადასაწყვეტი საკითხებია, დაყოვნება არ ივარგებს. სამ-ექვს თვეში უნდა მომზადდეს ეს პროგრამა; შემდგომ შესაძლებელი იქნება მისი განხორციელება ირაკლი ალასანიას მერობის დროს. ყოველწლიურად რაღაც ახალი გაკეთდება, რომ ქალაქს რეალურად დაეტყოს ახალი ხელმძღვანელობის ხედვა.

თქვენთვის ალბათ ცნობილია, რომ “თბილისის წყლის” პრივატიზების ხელშეკრულება გასაიდუმლოებულია. ეს შესაძლოა განვიხილოთ, როგორც ლოკალური, თბილისის პრობლემა, მაგრამ ფაქტია, ზოგადად, არსებობს მსხვილი ობიექტების პრივატიზების ხელშეკრულებების გასაიდუმლოების პრობლემა. რა შეიცვლება ამ მიმართულებით? რა გაკეთდება საჯაროობის უზრუნველსაყოფად?

ჩვენ მაქსიმალურად შევეცდებით, რომ ეს საჯარო იყოს. მე, პირადად და ჩვენს გაერთიანებას მიგვაჩნია, რომ ეს არ არის საკითხი, რომელიც საიდუმლო უნდა იყოს. იგივე ხდება ენგურ-ჰეს-ის კონტრაქტთან დაკავშირებით. აქ შესაძლოა რაღაც პოლიტიკური ფაქტორებიც არსებობს, მაგრამ ეს გაუმართლებელია, აბსურდულია. კომერციული ხელშეკრულება ვერ და არ უნდა იყოს საიდუმლო. ეს მხოლოდ დამატებით ეჭვებს აღძრავს საზოგადოებაში, რომ არის რაღაც დაფარული, ან რაღაც გარიგების დამალვა ხდება. რამდენი ხანი დამალავენ?!

როგორია თქვენი პოზიცია თბილისის შემოვლითი რკინიგზის პროექტთან დაკავშირებით? არსებობს მოსაზრება, რომ თბილისის ზღვასთან რკინიგზის გადატანა გარკვეულ საფრთხეებს ქმნის.

თუ გახსოვთ, მე რკინიგზის ხელმძღვანელი ვიყავი. ზოგადად, წმინდა ეკონომიკური თვალსაზრისით, რკინიგზის გადატანა გამართლებულად მიმაჩნია. თბილისის ცენტრში გამოთავისუფლდება მთელი რიგი უბნები, სადაც სხვა რამის გაკეთება იქნება შესაძლებელი; ეკოლოგიის კუთხითაც კარგია. თბილისის ცენტრიდან რკინიგზის გადატანა, რა თქმა უნდა, პოზიტიური მოვლენაა და ასე ვთქვათ, თბილისის განვითარებას პოზიტიურად წაადგება. პრობლემა ისაა, რომ ყველაფერი ჩუმად, დაუსაბუთებლად, ექსპერტების ჩარევის გარეშე კეთდება. ჩვენს შემთხვევაში, ცხადია, ეს გამორიცხული იქნება. იქნება ეს რკინიგზის, თუ სხვა პროექტი, ყველაფერი საჯაროდ, ექსპერტების ჩარევით გადაწყდება. თუ რომელიმე პროექტით ქალაქს საფრთხე დაემუქრება, მაშინ თავს შევიკავებთ, ან სხვა ალტერნატიულ გზას გამოვძებნით. ხელაღებით, ერთ ღამეში, რაღაც ვიწრო ჯგუფმა გადაწყვიტოს, რომ ხიდი აშენდეს, თუ მთელი მაგისტრალი და ეს ხდებოდეს ყოველგვარი სამშენებლო და ინჟინრული დასაბუთების გარეშე, აბსოლუტურად მიუღებელია. ჩვენ ვთვლით, ჩვენი მხრიდან, ასეთი მიდგომა გამორიცხული იქნება.

ჩქაროსნულ მაგისტრალთან დაკავშირებით რას ფიქრობთ?

როგორ გითხრათ... არც ვიცი, უნდა მომეწონოს, თუ არა; პროექტი ვერ ვნახე ვერსად. ჩვენმა პარტია შეეცადა მიეღო ინფორმაცია ჩქაროსნულ მაგისტრალთან დაკავშირებით - თუ რას ეფუძნება, რა გათვლებია, ტენდერი როგორ ჩატარდა და ა.შ. მაგრამ პასუხი არ გაგვცეს. როცა პასუხს არ ცემენ იმ პარტიას, რომელიც მერობის კანდიდატს აყენებს, ფაქტია, რომ იქ სერიოზული დარღვევებია. თავად მშენებლები ამბობენ - “ჩვენ არავითარი დასკვნა არ გვაქვსო”. რამდენადაც ჩემთვის ცნობილია, გარემოს დაცვის სამინისტროს ჯერჯერობით არ გაუცია დასკვნა. ყოველ შემთხვევაში, როცა მშენებლობა დაიწყო და განვითარდა მაშინ ეს დასკვნა არ ჰქონდათ. ეს უკვე კანონდარღვევაა. როცა ვთვლით, რომ ჩვენ ვაშენებთ სახელმწიფოს, რომელიც ეფუძნება კანონებს, ასეთი ქმედება მიუღებელია. როცა ხალხის აზრს არ ითვალისწინებ, არ ხდება დასაბუთება, ეკოლოგიურად, სამშენებლოდ თუ ინჟინრულად, ცხადია უკმაყოფილებას იწვევს. შემდგომში რამე რომ მოხდეს, კიდევ უფრო გართულდება ვითარება. ფაქტია, რომ ის ტყე-პარკი, რომელიც მზიურის ადგილას იყო, განადგურდება და ცხადია, მისი ადვილად აღდგენა წარმოუდგენელია. თანაც, ეს მწვანე ზოლები, ქალაქის ფილტვები, ისედაც ნაკლებად არის ქალაქში და ამით კიდევ ერთის განადგურება ხდება. გარდა ამისა, მნიშვნელოვანი იქნება ხმაურის პრობლემა, იქ მცხოვრები მოსახლეობა ჯერჯერობით ვერ ხვდება... მე მინახავს სხვაგან ჩქაროსნული მაგისტრალი, იქ ძალაინ დიდი ხმაურია. უნდა აშენდეს ხმაურისგან დამცავი ჯებირები, რაც ძალიან ძვირია და მგონი არ არის გათვალისწინებული. ფაქტია, რომ ეს ყველაფერი ხდება ჩუმად, სერიოზული დარღვევებით. შესაძლოა, საქმე გვაქვს კრიმინალთან. ჩვენ ყველაფერს დეტალურად შევისწავლით, დავეკითხებით მოსახლეობას. ჩვენ არ ვართ თანამედროვე კონსტრუქციების, თანამეროვე გადაწყვეტების წინააღმდეგი - ესეც საჭიროა; როდესაც ქალაქი ვითარდება, ამას ვერ აცდები. მაგრამ არის რაღაც ზღვარი, რისი გაკეთებაც არ შეიძლება.

დავამატებ, რომ დიღმის ტყე-პარკთან იგივე პრობლემაა. ირაკლი ალასანია და ალიანსის წევრები პირადად იყვნენ ჩართულნი, შეხვდნენ მოსახლეობას, ადგილზე შეისწავლეს პრობლემა. ჩვენ მივწერეთ წერილი და გვინდოდა მოგვეძიებინა მასალები. ირაკლი ალასანიას ეს საკითხები აინტერესებს და თვლის, რომ ეს საკითხები გადაწყვეტილი იქნება.

კიდევ ერთი მნიშვნელოვანი საკითხია ნარჩენების პრობლემა; რა მიდგომებს გამოიყენებთ ამ პრობლემის დასაძლევად?

ნარჩენები მნიშვნელოვანი საკითხია. ამ საკითხის გადაწყვეტა ვერაფრით მოხერხდა საქართველოში. არსებობს საბჭოთა კავშირის დროინდელი ნაგავსაყრელი, რომელიც თავად არის საფრთხის მომტანი. ეს საკითხიც კომპლექსურადაა გადასაწყვეტი. ნარჩენების შეგროვებას მეტნაკლებად ახერხებენ, მაგრამ ფაქტია, რომ პრობლემა შეიქმნა განთავსებასთან დაკავშირებით. კლასიკური მაგალითია ავტორიტარული ქვეყნისა, როდესაც არავის ეკითხებიან და თავად წყვეტენ, სად მოეწყოს ახალი ნაგავსაყრელი.

ზოგადად, ნაგავსაყრელი ყველაზე მარტივი გამოსავალია, მაგრამ ეს მიდგომა პრობლემას ვერ წყვეტს. უნდა იყოს ის მიდგომა რაც დასავლეთშია; არსებობს თანამედროვე ტექნოლოგიები. ამას ჩვენ დიდი ყურადღებას მივაქცევთ..

ბოლო კითხვას დაგისვამთ. სამწუხაროდ, საქართველოში ხშირად ხდება, რომ წინა ხელისუფლების მიერ აღებულ ვალდებულებაზე ახალი ხელისუფლება უარს აცხადებს. სულ სამი კვირის წინ, გიგი უგულავამ ხელი მოაწერა ევროპის მერების კოვენანტს. ეს გახლავთ კლიმატის ცვლილების გამომწვევი გაზების შემცირებისკენ მიმართული ინიციატივა. კოვენანტზე ხელმოწერით, თბილისი იღებს ვალდებულებას, რომ 2020 წლისთვის შეამცირებს სათბურ გაზებს 20%-ით. დავუშვათ, გიგი უგულავას ნაცვლად ირაკლი ალასანიაა მერი. პასუხისმგებლობით მოეკიდება ის თუ არა ამ ვალდებულებას?

უგულავამ რას მოაწერა ხელი, გაუგებარია; პრობლემის მოსაგვარებლად ხელი ხელზე არ დაუდია. ქალაქში ამდენი გაუმართავი მანქანა დადის და ეს ქმნის ძირითად პრობლემას, ამ მანქანების გამონაბოლქვით ხდება ჰაერის დაბინძურება. ყველა ვინც ამ დოკუმენტს შეუერთდა, მათ ეს პრობლემა მოგვარებული აქვთ. აქ ეს არავის უფიქრია. ცხადია, ეს საერთაშორისო ვალდებულებაა; ეს გარკვეულწილად ევროპის ქალაქების სტანდარტებთან მიახლოებაა და ჩვენ მას შევასრულებთ. ჩვენ გავაუმჯობესებთ ქალაქში გარემოს მდგომარეობას.
 

უკან
ინტერვიუები
მხარდაჭერილია საქართველოში ნიდერლანდების სამეფოს საელჩოს მიერ
Copyright © Green Alternative. All rights reserved